تامر حسني يستجيب لحملة مرضى ضمور العضلات..هتخدم كل المحتاجين ونخليهم ميمدوش إيديهم لحد يكسفهم

كتبت: آمال زغلول

استجاب الفنان تامر حسني، لمناشدة المذيع حسين الجهوري الذي طالبه بدعم مزاد الخير لمرضى ضمور العضلات، مثل ما حدث مع الطفلة رقية، لعلاج أطفال آخرين.

وكتب تامر حسني عبر حسابه الشخصي على موقع انستجرام .. قائلا: “يا حسين يا حبيبي أنا معاك وبدعمك وبدعم حملتك الإنسانية السامية وسلامي لصديقي وحبيبي أستاذ خيري رمضان”.

تامر حسني يستجيب لحملة مرضى ضمور العضلات..هتخدم كل المحتاجين ونخليهم ميمدوش إيديهم لحد يكسفهم

وقال حسني، “عندي فكره أتمنى رعايتها ودعمها من أجل كل مريض.. فكره مش هتخلي مريض واحد في مصر يمد إيده لحد، لو مليون مصري اشترك فيها هنحل أزمة الأمراض المكلفة، مليون مصري بس من 120 مليون مصري هيتطوعوا على حساب معين للتبرع وهيكون في لجنة مسؤولة من جهة رسمية في الدولة بتقيم الحالة ماديا”.

وأضاف: “المليون مشترك دول هيكونوا بيتبرعوا بشكل دائم كزكاة عنهم وعن أولادهم لخدمة مجتمع كامل، وممكن نسميها مثلاً صفحة المليون أخ، كل ما تظهر حاله محتاجة رقم صعب الصفحة هتدرسها وتعلن عن الحالة وتكلفتها، التبرع هيبقى في حدود من 20 جنيه لـ 40 جنيها حسب الحالة، بس ساعتها أول ما هنعلن هنجمع الفلوس في ثانية لكل المحتاجين، وكل المقتدرين اللي ربنا هينور قلوبهم”.

وأضاف تامر حسني، “المتبرعين مش هيحسوا إنهم دفعوا حاجة بس هينقذوا حياة أطفال كتير وناس كتير محتاجة، ومين عارف جايز الفكرة دي تخلي مفيش ولا واحد مريض في مصر مش لاقي يتعالج، وجايز المليون مشترك يكتروا”.

واختتم الفنان تامر حسني كلمته: “والله والله والله دي فكرة بسيطة مش هتكلف حد، بس هتخدم ناس كتير هتخدم بلد هتخدم كل المحتاجين ونخليهم ميمدوش إيديهم لحد يكسفهم، ربنا خلقنا عشان نساعد بعض وزي ما علمنا رسولنا الكريم.. خير الناس أنفعهم للناس. يعني ربنا بيحب الناس اللي بتنفع الناس وأي صدقة بتخرج من أي حد مستحيل تنقص ماله، بالعكس هيضاعفها ربنا في رزقه وهيكرمه ويطهره ويرفع عنه بيها يارب الفكره دي تتحقق”.

تامر حسني يستجيب لحملة مرضى ضمور العضلات..هتخدم كل المحتاجين ونخليهم ميمدوش إيديهم لحد يكسفهم

جدير بالذكر، جاء ذلك بعد ما تبنت الفنانة وفاء عامر فكرة دعم الطفلة رقية المصابة بـ”ضمور عضلات الحبل الشوكي”، حيث استقبلتها فى منزلها لتقفز بعد ذلك الحسابات بشكل كبير، وهو ما استقبلته أسرة الطفلة بفرحة غامرة، وخلال ساعات تم جمع مبلغ 40 مليون جنيه ثمن حقنة العلاج، ومن المنتظر أن تخضع رقية للعلاج خلال أيام قليلة بعد إجراء الفحوصات الطبية.