نصيحة تامر حسني في ليلة النصف من شعبان لجمهوره

كتبت: آمال زغلول

نصح الفنان تامر حسني، جمهوره ومتابعيه على مواقع التواصل الاجتماعي، بالعبادة والإستغفار والتقرب من الله في هذه الليلة، ليلة النصف من شعبان.

وكتب تامر حسني، عبر حسابه على الفيس بوك: “صباح الخير على أغلى الناس، معلش بعد إذنكم اقرأوا كلامي للآخر (نص شهر شعبان) من النهاردة لبكرة أعمالنا بتترفع لربنا يعني كلنا نلحق نستغفر ونطلب من ربنا يسامحنا”.

نصيحة تامر حسني في ليلة النصف من شعبان لجمهوره

وقال حسني، “محدش يتخيل انه عمل اخطاء كتير فمالوش عين يطلب ..لا لا لا ، مهما عملت اطلب حالًا وياريت لو نصوم بكرة أنا هعمل كده، أي حد عنده شغل ياريت يفضي شوية وقت عشان يستغفر ويدعي كتير بقدر الإمكان”.

وأضاف تامر حسني : “اليوم ده ليه سحر وانا جربته كتير قبل كده وهتحسوا في قلوبكم أن في حاجة اتشالت من عليكم وبقيتوا مبسوطين اكتر، ادعوا الله بكل اللي تتمنوه اوي اوي”.

وقال حسني، “اليوم فرصة لاي حد عمل ذنب كبير غصب عنه أو قاصد بس ندمان فرصة أن ربنا يسامحه دلوقتي، بس نفتكره ونطلب منه يلا يا جماعة من دلوقتي لبكرة اعتبروا أن ده يوم بسنة كاملة وجايز بكرم ربنا يبقى يوم بحياتك كلها اجتهدوا فيه اوي من صلاة، من تصدق، من ذكر ، من دعاء ، من صلة رحم”.

وقال تامر حسني: “اليوم ده تقدر من خلاله تبدأ صفحة جديدة مع نفسك ومع ربنا، اوعى تحس انك بعيد، ومتسمعش كلام أي حد يقولك يا عم انت بتعمل وبتعمل، قوله ملكش دعوة ليا ربنا هيحاسبني مش انت”.

واحتتم تامر حسني: “نخلي عندنا يقين مش عادي، ركزوا على كلمة يقين مش عادي إن ربنا سامعنا وهيستجيب لنا وهيحققلنا اللي بنتمناه واللي هيكون صالح لينا وهيسامحنا.. عشان تفرق كتير أوي لو بتدعي وعندك يقين أو معندكش، بتفرق كتير أوي صدقوني، ومتنسوش تدعولي معاكم بعد أذنكم محتاج دعواتكم جدا”.